مراجعة الحلقة الآولى من لعبة Life IS Strange: Before The Storm

2,412
الحلقة الأولى من لعبة Life Is Strange:Before The Storm
بتبدا الحلقة بشخصية Chloe أحد أبطال الجزء القديم من اللعبة، في البداية هتبدأ في بيت وسط الغابة معمول فيه حفلة لواحد من أهم الباندات المفضلين عند Chloe وهو باند Firewalk.
البطلة “Chloe” معهاش تصريح دخول للحفلة فبتحاول انها تدخل من خلال انها تعمل مشكلة مع الامن الخاص بالحفله، مشادات بينها و بين الراجل ممكن توصل للضرب اوقات 😀
بعد ما يفضلوا يتكلموا وطبعا انت هتتحكم في كل كلمة هتقولها للراجل ده هتدخل الحفله وهتلاقي مكان صغير جدا تدخل منه ومليان ناس للاسف مش هتعرف تدخل الا لما تفضل تزق في الناس وتعدي من وسطهم، وهي Chloe بتعمل كده هتخبط في واحد من ضمن الناس اللي واقفين وهتوقع عليه البيـرة اللي كان بيشربها فهيبدأ يعمل معاها مشكلة، Chloe هتسيبه و تمشي و بتطلع السلم وتقرر انها تشوف الحفله من مكان تاني بعيد عن الناس، اثناء الانسجام هيطلعلها الراجل ويعمل معاها مشكله عشان يتخانق معاها، هيبدا يكسر كاس عشان يضربها بيه لكن هتتدخل في الوقت المناسب واحده من أشهر شخصيات المدرسة الثانوية بتاعت Chloe وهي Rachel Amber واحده من أحلى و اكتر البنات الموديل في اللعبة و اشهرهم وسط المدرسة وهتنقذ Chloe من المشكلة و هتاخدها و يجروا مع بعض، هيدخلوا الحفله وسط الناس و هيقضوا اليوم شرب مخدرات وويسكي وعد كده بتخلص مقدمة الللعبة وتبدأ مع Chloe في اوضتها وهي مامتها بتناديها عشان تنزل تفطر، بتخرج كلوي من اوضتها و تنزل لمامتها وطبعا زي اي ام خايفه على بنتها هتديها كلمتين عن المخدرات و عن الويسكي اللي بقى زياده جدا في الفترة اللي فاتت وبتحاول تقنعها بانها تبطل ده وتتعامل كويس مع جوز امها اللي امها اتجوزته بعد موت ابوها في حادثه عربية مع كلوي و هو بيوصلها للمدرسة، بتوافق او بترفض طلب ام كلوي على حسب ردك و اسلوبك في اللعبة، بعد كده بتروح كلوي لجوز مامتها عشان يوصلها لمدرستها وطبعا بما انه راجل كان شغال في الجيش فبيديها فوق دماغها هو كمان 😀
كلوي بتبدا أنها تنهي الموضوع مع جوز امها وتروح تساعده في انه يصلح عربيته عشان يوديها مدرستها و ميتأخرش.
بتوصل كلوي للمدرسة وبتفتح الباب عشان تحضر حصة الكيمياء مع مدرسها لكن “ريتشل” بتظهر مره تانيه وبتاخد كلوي لحصة التمثيل مع المدرس بتاع الماده وبيتكلموا شوية وبعدين تساعدها كلوي في تغير لبسها، وتطلب منها “ريتشل” انها تخرج معاها في خروجه سرية وهروب من المدرسة.
بتخرج “كلوي” و “ريتشل” مع بعض ويقضوا وقت لذيذ سوا، خصوصا في لعبة مراقبة الناس من بعيد، بتاخد “ريتشل” كلوي وتقولها انهم هيقفوا على قمة جبل معاهم منظار يشوفوا فيه الناس من بعيد ويحاولوا يخمنوا هما بيعملوا ايه او بيتكلموا في ايه، من هنا تبدأ المشكلة مع ريتشل و تخليها تتحول بنسبة 100% مع كلوي، بعد ما يقضوا وقت لذيذ الوقت بيبقى غم على دماغهم 😀
كلوي بتحاول تعرف من ريتشل ايه اللي مضايقها وبعدين تعترفلها كلوي بسر مهم جدا ان واحد من ضمن الناس اللي شافوهم في المنظار ده هو ابو ريتشل اللي كان بيبوس واحده 😀 تحت شجرة 😀 وبلاش نتكلم في التفاصيل اكتر من كده.
طبعا “ريتشل” هتتضايق جدا لانها بتعشق والدها بشكل مش طبيعي لدرجة انها محتفظة بصورة ليها معاه من لما كان عندها تقريبا 8 سنين.
الاتنين بيتفقوا انهم يهربوا من البلد نهائيًا ويبعدوا عن الأهل ومشاكلهم، تمسك “ريتشل” الصورة اللي محتفظه بيها مع ابوها و تحرقها وتبدأ تنهار وتصرخ والحريقة تكبر وتمسك في غابه كبيرة جدا جدا جدا.
من هنا تنتهي الحلقة الأولى بعنوان Awake بداية ممتازة تشدك و تجربك على انك تستنى الحلقة الجديدة في اثارة وتسارع رهيب للاحداث الخاصة باللعبة.ز
قريب هنتكلم عن الحلقة التانية ^_^
تابعونا

Comments

Loading...

You might also like More from author